اجمل ايام..ايام زمان

حد يجماعه فاكر واحنا صغيريين لما كنا بناخد مصروف نص جنيه و كنا نروح المدرسه نجيب بيه ازازه حاجه ساقعه و كيس شيبسى
*
طب
حد فاكر لبان على بابا لما كنا كلنا جايبين الالبوم و بنشترى اللبان و
نقعد نجمع صور الحراميه الى دماغتها طالعه من الزير و نبدل الصور مع بعض
عشان نكمل الالبوم وكان الواحد بيبقى نفسه يكسب اوى وكانت الجوايز طقم
كوبيات شاى او كوره كفر او شطرنج او مكاوه
*
طب حد فاكر لما كنا
بنرجع من المدرسه بسرعه عشان نلحق الفيلم الابيض و الاسود الى كان بيجى
الساعه 1على القناه الاولى و نبقى قرفانين يوم الاربع عشان مش هيجيبوا
فيلم و هيجيبوا الحلقه الاخيره من مسلسل
*
طب حد فاكر يوم الجمعه
لما كنا بنصحى من صباحيه ربنا قبل اى حد فى البيت ونفتح التليفزيون ونقعد
نستنى برنامج سينما الاطفال ونبقى منشكحين موت واحنا قاعدين بنتفرج
*
طب
حد فاكر لما كنا بنرجع من المدرسه و نبقى عايزين نخلص الواجب بسرررعه اوى
عشان محدش يغلس علينا و يسبونا نتفرج على مسلسل 7 و ربع بتاع القناه
الاولى ومكنش حد فينا بيتفرج على المسلسل بتاع الساعه 6 الى بيجى عالقناه
التانيه
*
طب حد فاكر كابتن ماجد لما كان بيقعد يشوط الكوره فاربع
خمس حلقات و احنا قاعدين منشكحين اوى ومستنين الى هيحصل ولا حد فاكر
مازنجر وفاتن و ابو الغضب
*
طب حد فاكر قبل رمضان لما كنا نقعد نعمل
زينه رمضان مش الجلاد و الدباسه لا لا لا ورق الكراريس الى كنا بنظبطوا
بالمقص و نلزقه على الحبل بعجينه نشا وميه ويسلام على اول يوم رمضان لما
نخرب الشارع بمب وحد فاكر الصواريخ مش الصفره لا لا لا الى كانت طويله و
معموله من ورق كراريس برضه
*
طب حد فاكر ساعة الفطار فرمضان لما كنا
نبقى قاعدين نفطر ومش مركزين مع حد عشان مشغلين القناة الاولى و مبسوطين
اوى عشان هنتفرج على سلاحف النينجا وفرام و شنخر ومنخر وتخلص نئوم نقلب
بسرعه على القناه التانيه ليييييييييه بئه ؟؟؟ عشان مسلسل البورنجر وريتا
الشريره و كنا كلنا بنحب الواد الاحمر قوى
*
طب بوجى وطمطم قبل
الفطار فرمضان بعد ما بنكون جايين من المدرسه ولا حد فاكر ماما نجوى وبؤلز
ولا حد فاكر كارتون كعبول وفوازير نيللى ولا فوازير فطوطه الى كنا كلنا
مدميننها ولا مسلسل الف ليله وليله بتاع رمضان
*
طب حد فاكر ليله
العيد لما يوم الوقفه نخش نستحمى ونضرب الترنج الجديد بتاع الوقفه و نيجى
بليل نطلع اللبس الجديد ونحطه جنبنا عالسرير ونبقى مستنيين الصبح يطلع
بفارغ الصبر عشان نقوم نلبس اللبس الجديد و ناخد العيديه من قرايبنا وكل
متاخد العيديه من حد تقعد كل شويه تطلع العيديه وتشوف المبلغ كله وصل كام
*
طب
حد فاكر بستك بستك بستك نو شوكلاته جيرسى هناكلوا الجو ولا حد فاكر اللبان
السحرى دوق دوق دوق الضنضورمه ا لا لا لا له طب حد فاكر بسكوت بمبو المدور
الى عليه شكولاته ولا البوذو الى كان ببريزه وكنا بنشتريه عشان نكسب جواه
بلونه ولا دراكولا وهيلا هوب ولا حد فاكر بسكوت الشمعدان و المسابقات
بتاعته لما كنا نجيب الالبوم ونقعد نشترى ونجمع ونلزق ونبقى مهتميين
بالموضوع اااخر حاجه وواثقين اننا هنكسب
*
طب حد فاكر الكازوز بتاع
الحاجه الساقعه والمسابقات بتاعت العجله ومكنش حد بيلاقى الجدون و كان فى
تكسب واحده حاجه ساقعه تانيه وكنا مقضينها كازوز وواثقين اننا لازم نكسب
وكنا نخليهم فى البيت يجيبوا الجبنه النستو الى بتكسب مش فارقه سينا من
سونيا المهم الى عامله مسابقه وجواها استيكرات وكانت الاكتر بتبقى طعمه
*
طب
حد فاكر لما كنا نروح المدرسه و نفتح كيسة السندوتشات نتكدر اووووى لو
لقينا ساندوتشات جبنه نستو ولا جبنه بيضه ونفرح اووى لو لقينا معانا
سندوتشات لانشون
*
طب حد فاكر اول يوم لما نرجع من المدرسه وننزل
نجيب الكراريس و الجلاد مش البلاستك الى بيدخل بسهوله لا لا لا الفرخ
الكبير الى بيتقطع و يتلزق بسلوتب وبعد ما نخلص نقعد نعمل الواجب فى
كراريس الواجب عشان فى كراريس تانيه بتاعت الحصه و ماده العربى كان بيبقى
ليها بتاع عشرتاشر كشكول مش عارف واحد للتعبير وواحد للاملاء و واحد
للقراءه
*
طب حد فاكر اخر يوم فى الامتحانات كنا بنرجع البيت عاملين
ازاى و يدوب نحط المقلمه و نسرح فى الشوارع نديها كوره وبلى و استغمايه
وسبع طوبات وطير وعنكب شد واركب و ميلموناش من الشارع الا بليل
*
طب
حد فاكر الناس الرخمه الى كنا كل ما نلعب كوره يطلع يقولك لو جت هنا
هقطعلكوا الكوره ديه ولا اللعب عند بيتك يا بنى منك له بدل ما ارش ميه
*
طب
حد فاكر لما كان حد يجى يصحيك للمدرسه الصبح كنا بنبقى متكدرين اد ايه
ونفسنا ننام اوى خصوصا فى الشتا وبعد ما نصحى نبقى نفسنا فعشر دقايق نوم
كمان قال يعنى دول الى هيظبوظلنا بقيت اليوم
*
طب حد فاكر طبور
المدرسه لما محدش فينا بيبقى واقف مركز ولا فاهم حاجه اساسا بس واقفين غصم
واقتدار وخلاص و ساعة تحيه العلم لازم حد يستظرف فى النشيد ويقعد يقول
زبادى زبادى او حماتى حماتى بدل بلادى بلادى
*
طب حد فاكر برامج
تاكسى السهرة و بانوراما فرنسيه ومسلسل هرقليز وزينا الى كانوا بيجوا
عالقناه التانيه الساعه9 و كنا بنعشقهم بالرغم من الهجايس الجامده الى
فيهم وكنا منفوتش ولا حلقه
*
طب حد فاكر لما كنت تخلص السنه وتدى الكتب بتاعتك وسلاح التلميذ لابن الجران او حد من قرايبك الى اصغر منك بسنه
*
طب
حد فاكر المسطره المشرشره الى فيها سمك وميه و الاستكيرات الى كنا بنلزقها
عالكشاكيل و القلم الرصاص الى بيتبرى لما يدوخنا وكنا بنزقطط اد ايه لما
يتعملنا نجمه فى الكراسه ونمشى نتعايق بيها فى الفصل وسط العيال ولما يجى
يعاقبونا يقولك اعمل الواجب الى مكنش حد فينا بيحبه اساسا 5 مرات و 7 مرات

هههههههههههههههههههههههه
ياخبق اببيض فكرتنا بالذى مضى والله
هههههههههههههههه
انا افتكرت شويه حاجات كده بجد انا هموت من الضحك معقوله انا كنت بعمل كده ايه الهبل ده
احم احم
ههههههههههههههههههههههههه
بجد موضوع هااااااااااااااااااااايل جدااااااااااااااااااااااااااااا
شكر يا yoha
على الموضوع الجميل ده

يلا يا ستي اكتبيلني اللي كنت بتعملية نضحك سوي مش قصدي حاجة والله بس كلنا كنا بنعملها

وعلي فكرة انا
يحيي
من الاسكندرية
كلية هندسة

مستني اتعرف علي اعضاء المنتدي انشاء الله

هههههههههههههه
لالالالالا ماينفعش خااالص
انا متابعكم معاكم ان شاء الله
كل عضو يدخل الموضوع يحكلنا عن ايام طفولته
ما عدا اول عضو رد على الموضوع الى هو انا يعنى

هههههههههههههههههههههههههههههه

لالالالالالالالالالالالالالالالا
المفروض اول عضو هو اللي يحكي

ههههههههههههههههه
انتو هتتخانقو ولا اية
اهدو يا جماعة
انا اللى هحكى الاول

طبعا انا عمرى مانسى سلاحف النينجا فعلا كنت بحبها اوى
كمان المغامرون الخمسة لو تفتكروهم انا كنت بموت فيهم وخاصة المغامر الاسود
ولو تفتكرو مسلسل هركليز اللى كان بيييجى الساعة عشرة ع التانية
كنت بسمعو وانا ف اولى ابتدائى
طبعا مش هنسى لعب البلى ف الشارع
وكمان الدبور اللى كنا بنعمل فية مسابقات كاس العالم للى الدبور بتاعو يفضل يلف اكتر وقت
ولن انسى المطوشة الاوربية اللى كنت بعملها ف الشارع
وخاصة لما شوط كورة على واحد صاحبى دراعو انكسر منها
وجبسوة ومن ساعيتها محدش بيلعب معايا فى الشارع
ولعبة السيجة الشهيرة اللى كانت بتقام مراسم خاصة ليها
اولا كوبايتين شاى من اى بيت قريب مننا
وطبعا احنا فارشين ف الشارع
وبنعمل قرعة على اللى هيلاعبو بعض وغالبا بنبقى ستة او سبعة
ودايما العبد لله كان بيكسب
اما عن الدراسة
فانا دايما كنت من رواد السور
دايما كنت بدخل المدرسة من ع السور لانى بروح متاخر
ولما بطلع برضو بيبقى من ع السور
لانى ببقى هربان
ولما كان السور بيبقى عالى كنت بقلع القميص واربط الكم بناعو على شكل دايرة
وارمية ع السور واشبكة فى اى ماسورة فوق السور واتعلق بية وانط
كتير اوى كنت بروح بكم واحد
والعبد لله كان احسن واحد يالف على اهلة
كنت اققلهم دانا انقذت غريق فى الترعة اللى قبل مدرستنا والقميص انقطع وهو بيشد فية
ومنساش ابدا المدرسين بتوعنا اللى كانو بيقفو جنب السور مخصوص علشانى
لانى كنت بهرب زمايلى معايا
وبردو كنت بنط من ع السور
لدرجة انى كنت بشوف الباب مفتوح ساعات وبردو انط من ع السور
متعود بقى

وفى النهاية
مش هنسى الحوار الجميل دة منكم ابدا
وشكرا لكاتب الموضوع

اخوكم
زعيم عصابات سابق

امير الانتقام

لوووووووووووووووووووووول بجد جامد جداجداجد

يلا ورينا انت بقي ياستي كل واحد حكي موقفة

ناقص انت

الموضوع جامد جدااااااااااااا يا عم الرئيس والى الامام دائما ميدو______________________عاشق ____________الرومانسية

شكرا لمروركم جميعا

تقبلو تحياتي

هههههههههههههههههههه
يسلمو على الموضع الرائع دة
جميييييييييييييييييييل
فكرتنا بالزى مضى والله
الواحد نفسة الحاجات دى ترجع تانى
هههههههههههههههههههههه

» صيام السته ايام من شوال
» اجمل-اروع-اصعب-احن
» اجمل المعطاف للمحجبات